ଅର୍ଗସ ବ୍ୟୁରୋ: ମିଶନଶକ୍ତିକୁ ନେଇ ବିଭାଗୀୟ ମନ୍ତ୍ରୀଙ୍କ ବଡ଼ ବୟାନ । କହିଲେ, ବିଭାଗ ବନ୍ଦ ହେବନି ବରଂ ଦୌଡିବ । ପୂର୍ବରୁ ଯାହା ହେଉଥିଲେ ଏବେ ତାହା ହେବନି । କାରଣ ଏବେ ବିଭାଗର ରୂପରେଖ ବଦଳିବ । ଭୋଟ୍ ବ୍ୟାଙ୍କରେ ଏଣିକି ଗଣା ହେବେନି ମିଶନ ଶକ୍ତି ମହିଳା । ରାଜନୀତିରେ ବି ପଶିବେନି SHG ସଦସ୍ୟା । ବିଜେପି ନୂଆ ସରକାରରେ ଏହି ବିଭାଗକୁ ସର୍ବାଧିକ ଗୁରୁତ୍ୱ ଦିଆଯାଉଛି । ବିଭାଗୀୟ ମନ୍ତ୍ରୀ ପ୍ରଭାତୀ ପରିଡ଼ାଙ୍କୁ ମିଶନ ଶକ୍ତି ସଚିବ ଶାଲିନୀ ପଣ୍ଡିତ ଏବଂ ନିର୍ଦ୍ଦେଶକ ବିନୀତ ଭରଦ୍ୱାଜଙ୍କ ସହ ବିଭାଗୀୟ ଅଧିକାରୀ ଦେଇଥିଲେ ଅଢେଇ ଘଣ୍ଟାର ପ୍ରେଜେଣ୍ଟସନ । ଆଉ ତା' ପରେ କିଛି ଏମିତି କହିଛନ୍ତି ପ୍ରଭାତୀ ।
ଗୋଟିଏ କି ଦୁଇଟି ନୁହେଁ ବରଂ ୧୯ଟି ବିଭାଗ ସହ ଅନୁବନ୍ଧିତ ହୋଇ କେମିତି କାର୍ଯ୍ୟ କରୁଛି ମିଶନ ଶକ୍ତି? ଆଉ କେଉଁଠି ରହୁଛି ସମସ୍ୟା? ସମୀକ୍ଷା ପରେ ମିଶନଶକ୍ତି ଏକ ମାଇକ୍ରୋ ସରକାର ବୋଲି କହିଥିଲେ ଉପ ମୁଖ୍ୟମନ୍ତ୍ରୀ । ଏହାସହ ଆଗାମୀ ଦିନରେ କେମିତି ବିଭାଗ ଭଲରେ କାମ କରିବ ସେନେଇ ମାନସମନ୍ଥନ ହେବ ବୋଲି କୁହାଯାଉଛି ।
ମୋଟ୍ ଉପରେ, ରାଜ୍ୟରେ ମିଶନ ଶକ୍ତି ଜରିଆରେ ୬ ଲକ୍ଷ ୨ ହଜାର ସ୍ଵୟଂ ସହାୟକ ଗ୍ରୁପରେ ପ୍ରାୟ ୭୦ ଲକ୍ଷ ସଦସ୍ୟା ରହିଛନ୍ତି । ଅଟଳ ବିହାରୀ ବାଜପେୟୀଙ୍କ ସରକାର ସମୟରେ କେନ୍ଦ୍ରରେ ବିଜେପି ସରକାର ଆରମ୍ଭ କରିଥିଲା ଏସଏଚଜି । ମହିଳା ସଶକ୍ତୀକରଣ ପାଇଁ ଏହି ଯୋଜନା ଆରମ୍ଭ କରିଥିଲେ କେନ୍ଦ୍ର ସରକାର । ହେଲେ ପରବର୍ତ୍ତୀ ସମୟରେ ଓଡ଼ିଶାରେ ନବୀନ ସରକାର ଏହି ଗୋଷ୍ଠୀଗୁଡିକୁ ସଂଗଠିତ କରି ନିଜ ଭୋଟ୍ ବ୍ୟାଙ୍କ ଭଳି ବ୍ୟବହାର କରୁଥିବା ନାନା ଅଭିଯୋଗ ଆସିଥିଲା । ଖାଲି ଅଭିଯୋଗ ହେଉଥିଲା ତାହା ନୁହେଁ ବରଂ ମିଶନଶକ୍ତିର ପୂର୍ବତନ ସଚିବ ଏସଏଚଜି ମହିଳାଙ୍କୁ ବିଜେଡି ଲାଗି କାମ କରାଉଥିବାର ଅଭିଯୋଗ ବି ହୋଇଥିଲା । ଯେଉଁଥି ଲାଗି ତାଙ୍କୁ ବଦଳି ପାଇଁ ନିର୍ଦ୍ଦେଶ ଦିଆଯାଇଥିଲା ।
କଥା ହେଲା, ରାଜ୍ୟରେ ମିଶନଶକ୍ତି ବିଭାଗକୁ ନେଇ ବେଶ ଚର୍ଚ୍ଚା ହେଉଥିଲା । କେମିତି ଏହି ବିଭାଗର ଭୋଟ ବ୍ୟାଙ୍କକୁ ପ୍ରଭାବିତ କରୁଛି ସେନେଇ ଅନେକ ସମୟରେ ଅଭିଯୋଗ ହେଉଥିଲା । ହେଲେ ସରକାର ବଦଳିବା ପରେ ଏବେ ବିଭାଗ କେମିତି ଭଲରେ କାମ କରିବ ସେନେଇ ମନ୍ତ୍ରୀ ପ୍ରତିକ୍ରିୟା ଦେବା ପରେ ଚର୍ଚ୍ଚା ଆହୁରି ଜୋର ଧରିଛି ।